Qərbi Azərbaycan İcması

Dekabrın 21-də Heydər Əliyev Mərkəzində Gənclər və İdman Nazirliyinin dəstəyi, “Regional İnkişaf” İctimai Birliyi və Qərbi Azərbaycan İcmasının birgə təşkilatçılığı ilə "Qərbi Azərbaycan: Tarixin İzi ilə-İntellektual Oyunlar Çempionatı" layihəsi çərçivəsində 16-29 yaşarası gənclər arasında “Nə? Harada? Nə zaman?” və “Kviz” oyunları keçirilib.

Tədbir iştirakçılarını salamlayan “Regional İnkişaf” İctimai Birliyinin nümayəndəsi Murad Qasımlı, Gənclər və İdman Nazirliyinin İctimai inkişaf sektorunun müdiri Elşən Qəhrəmanov, Qərbi Azərbaycan İcmasının Müşahidə Şurasının sədri, AMEA-nın müxbir üzvü, professor Misir Mərdanov və Qərbi Azərbaycan İcmasının Ağsaqqallar şurasının üzvü, akademik Elşad Qurbanov layihənin məqsədi, Qərbi Azərbaycan tarixi, coğrafiyası, mədəniyyəti, incəsənəti, ədəbiyyatı, görkəmli ictimai xadimləri və tarixi şəxsiyyətləri, toponimləri, folkloru, eləcə də Qərbi Azərbaycandan zorla çıxarılmış soydaşlarımızın öz doğma yurdlarına qayıtması istiqamətində ölkəmizin haqlı mövqeyi barədə xüsusilə gənclərin bilik və məlumatlılığının artırılmasının əhəmiyyətini, bu istiqamətdə müxtəlif layihələrin həyata keçirilməsinin vacibliyini diqqətə çatdırıb.

Daha sonra “Nə? Harada? Nə zaman?” və “Kviz” oyunlarına start verilib. İlkin mərhələdə qeydiyyatdan keçmiş 30 komanda “Nə? Harada? Nə zaman?” intellektual oyununda mübarizə aparıb. Dörd turdan ibarət “Nə? Harada? Nə zaman?” intellektual oyununun sonunda münsiflər heyəti tərəfindən komandaların cavabları sayılmış, nəticələrə əsasən “Zəngəzur” komandası I, “Xudafərin” komandası II və “Köhnə Qvardiyaçılar” komandası III yerə layiq görülüb.

Növbəti mərhələdə komandalar “Kviz” oyununda iştirak edərək 15 mövzu üzrə sualları cavablandırmışdır. Münsiflər heyəti tərəfindən nəticələr hesablanmış, “Zəngəzur” komandası I, “Xudafərin” komandası II və “Köhnə Qvardiyaçılar” komandası isə III yerə layiq görülüb.

Sonda qalib komandalar müxtəlif mükafatlar və sertifikatlarla təltif olunub.