Klod Vizlerin Azərbaycan ilə Ermənistan arasında münasibətlərin normallaşdırılması müstəvisində yersiz müdaxiləsi ilə əlaqədar bəyanat
22 may 2024, 18:30

Lüksemburq deputatlar palatasının sədri Klod Vizler 22 may 2024-cü il tarixdə Ermənistan parlamentinin iclasında qərəzli bəyanatla çıxış etmişdir. O, “ürəkağrısı” ilə Qarabağdan könüllü çıxan ermənilərin “halına yanmış”, Azərbaycanı guya hansısa “itkin düşmüş şəxslərin” siyahısını təqdim etməyə çağırmışdır.

Qərbi Azərbaycan İcması olaraq Vizlerin Azərbaycanı “etnik təmizləmədə” günahlandırmağa cəhd edən və müharibə cinayətlərində, eləcə də insanlıq əleyhinə cinayətlərdə və terrorçuluqda əli olan şəxslərin “azad edilməsini tələb edən” bəyanatını   rədd edir və kəskin şəkildə qınayırıq. 

Əslində etnik təmizləmə siyasətini həyata keçirən Ermənistandır. 30 il ərzində Azərbaycan torpaqlarını vaxtilə işğal altında saxlamış bu ölkə 300 mindən çox azərbaycanlını 1987-91-ci illərdə öz ərazisindən zorla çıxarıb. Birinci Qarabağ müharibəsi zamanı itkin düşən 4000-dən çox azərbaycanlının taleyinə isə hələ də aydınlıq gətirilməyib. 

Bütün bunlar sübut edir ki, Vizler Azərbaycana qarşı münasibətində qərəzlidir və ayrı-seçkilik mövqeyi nümayiş etdirir. Azərbaycan və Ermənistan arasında münasibətlərin normallaşdırılması, o cümlədən, sərhədlərin delimitasiyası istiqamətində atılan son addımlar müstəvisində regiondan kənar dövlətlərin bu cür ziyanlı və yersiz müdaxilələri yolverilməzdir.

İcma Klod Vizleri ədalətli mövqe sərgiləməyə, 300 mindən çox qərbi azərbaycanlının öz ata-baba yurduna qayıtması ilə bağlı məsələyə reaksiya verməyə çağırır.