Qərbi Azərbaycan İcması ATƏT-in İnsan Ölçüsü Konfransı çərçivəsində yan tədbir keçirmişdir
08 oktyabr 2024, 13:38

8 oktyabr 2024-cü il tarixində Varşavada, ATƏT-in İnsan Ölçüsü Konfransı çərçivəsində, Qərbi Azərbaycan İcması tərəfindən qayıdış hüququ mövzusunda yan tədbir keçirilmişdir. Tədbirin əsas məqsədi, Ermənistandan qovulmuş azərbaycanlıların öz tarixi torpaqlarına təhlükəsiz və ləyaqətli şəkildə geri qayıtmaq hüququnun təmin edilməsinə beynəlxalq səviyyədə diqqəti artırmaq olmuşdur. Tədbir zamanı qayıdışın hüquqi, humanitar və praktiki aspektləri geniş şəkildə müzakirə edilmişdir.

Tədbirdə moderatorluğu şərhçi və jurnalist Dr. Harvey Dzodin etmişdir. Qərbi Azərbaycan İcması İdarə Heyəti sədrinin müavini, Milli Məclisin deputatı Ramil Həsən çıxış edərək, Ermənistanın törətdiyi etnik təmizləmə, icmanın qayıdış hüququ sahəsində gördüyü işlərdən danışmış və bu mövzunu qlobal gündəmdə saxlamaq üçün həyata keçirilən səyləri vurğulamışdır. Bosniya və Herseqovinadan olan məcburi köçkün Erna Yaşareviç köçkünlük ilə bağlı şəxsi hekayəsini bölüşərək, ədalətin təmin edilməsinin barışıq üçün zəruri şərt olduğunu qeyd etmişdir. Azərbaycan Respublikasının İnsan Hüquqları üzrə Müvəkkili (Ombudsman) aparat rəhbəri Aydın Səfixanlı Ermənistanın Qərbi azərbaycanlıları etnik təmizləməyə məruz qoyması və onların qayıdışına imkan verməməsi səbəbindən meydana çıxan insan hüquqları pozuntuları barədə çıxış etmişdir.

Bu tədbir, beynəlxalq ictimaiyyətin diqqətinin Qərbi Azərbaycandan qovulmuş azərbaycanlıların problemlərinə və onların qayıdış hüququnun təmin edilməsi məsələsinə yönəltmək üçün faydalı olmuşdur. Tədbir, eyni zamanda, Qərbi azərbaycanlıların təhlükəsiz və ləyaqətli şəkildə qayıdışına, ədalət və barışığa nail olmaq üçün beynəlxalq dialoqa töhfə vermişdir.