Qərbi Azərbaycan İcması

Azərbaycan Dillər Universitetinin İngilis dilinin fonetikası kafedrasının müdiri dosent Xatirə Qocayevanın təşəbbüsü və İngilis və fransız dilləri fakültəsinin tələbələrinin iştirakı ilə "Qərbi Azərbaycanda Azərbaycana məxsus tarixi abidələr" adlı Qərbi Azərbaycanla bağlı həqiqətlərin gənc nəslə ötürülməsi məqsədilə marifləndirici tədbir keçirilib.

Tədbir ömür boyu Azərbaycanın qədim torpağı olan Göyçə mahalında yaşayıb yaratmış Azərbaycan aşıq yaradıcılığının görkəmli nümayəndəsi, Aşıq Ələsgərin heykəlinin ziyarəti ilə başlayıb.

Daha sonra isə tələbələr Qərbi Azərbaycan İcmasının inzibati binasını ziyarət ediblər.

Qərbi Azərbaycan İcmasının Aparat rəhbəri Qalib Qasımov tələbələri icmanın binasında yaradılmış şəraitlə tanış etdi və Qərbi Azərbaycan həqiqətləri ilə bağlı geniş məlumat verdi.

Qərbi Azərbaycan İcması Aparatında gənclərlə iş üzrə məsul şəxs Anar İrzaquluyev xalqımızın "Böyük Qayıdış" uğrundakı ali mübarizəsində dünya ictimaiyyətinə Azərbaycan həqiqətlərinin çatdırılması prosesində gənclərin informasiya bazasının genişləndirilməsi istiqamətində görülən işlərdən bəhs edib.