Qərbi Azərbaycan İcması

Əziz Ələkbərli,

Milli Məclisin deputatı,

Qərbi Azərbaycan İcması

İdarə Heyətinin sədri

Bu gün Azərbaycanda Bilik Günüdür. Bu gün məktəblərin qapıları açılır, sinif otaqları uşaqların səsi ilə canlanır, müəllimlər yeni dərs ilinə başlayır. Amma Bilik Gününün mənası yalnız dərslərin başlaması ilə məhdudlaşmır. Bu gün həm də Azərbaycanın gələcəyinə baxdığımız, sabahın necə bir cəmiyyət olacağını düşündüyümüz gündür.

Bir ölkənin gələcəyini onun məktəblərinə baxaraq təsəvvür etmək mümkündür. Məktəbə münasibət əslində dövlətin insana, müəllimə, elmə və gələcəyə münasibətidir. Azərbaycan tarixində məktəbə və müəllimə dövlət qayğısının ardıcıl siyasətə çevrilməsində Ümummilli Lider Heydər Əliyevin müstəsna xidmətləri var.

Heydər Əliyev təhsili Azərbaycanın gələcəyinin əsas dayaqlarından biri hesab edirdi. O, müəllim əməyinə həmişə yüksək qiymət verir, məktəbin yalnız bilik verən deyil, həm də vətəndaş yetişdirən mühüm bir ocaq olduğunu vurğulayırdı. Onun rəhbərliyi dövründə Azərbaycanda təhsil sisteminin inkişafı, yeni məktəblərin yaradılması, gənclərin ali təhsil alması və milli kadr potensialının formalaşdırılması istiqamətində mühüm addımlar atıldı. Ulu Öndərin təhsilə münasibətində əsas fikir aydın idi: Azərbaycanın sabahı bu gün yetişdirilən gənclərdən asılıdır.

Bu gün qürurla deyə bilərik ki, Heydər Əliyevin müəyyən etdiyi bu strateji xətt Prezident cənab İlham Əliyev tərəfindən uğurla və ardıcıl şəkildə davam etdirilir. Təhsilə dövlət qayğısının gücləndirilməsi, məktəb infrastrukturunun yenilənməsi, yeni məktəb binalarının tikilməsi, mövcud məktəblərin əsaslı təmiri, müəllimlərin sosial və peşəkar inkişafına diqqətin artırılması bu siyasətin mühüm istiqamətlərindəndir.

Bu siyasətin nəticələrini ölkənin müxtəlif bölgələrində görmək mümkündür. Yeni məktəb binaları tikilir, uzun illər istifadə olunmuş məktəblər əsaslı təmir edilir, təhsil müəssisələri müasir avadanlıqlarla təmin olunur. Bütün bunlar sadəcə tikinti və təmir layihələri deyil. Hər yeni məktəb binası yüzlərlə uşağın daha yaxşı şəraitdə təhsil alması, hər yenilənən sinif otağı müəllimin öz işini daha rahat görməsi deməkdir.

Təhsilə ayrılan dövlət vəsaitinin ildən-ilə artırılması da bu sahəyə verilən önəmin göstəricisidir. Dövlətin təhsilə sərmayə qoyması əslində Azərbaycanın insan kapitalına sərmayə qoymasıdır. Çünki neft, qaz, texnologiya və digər resursların hamısından daha qiymətli olan insanın biliyi, bacarığı və yaradıcı düşüncəsidir.

Bu gün Azərbaycan məktəbinin qarşısında yeni vəzifələr dayanır. Müasir dünya sürətlə dəyişir, yeni texnologiyalar həyatımızın bütün sahələrinə daxil olur. Belə bir şəraitdə uşaqlarımıza yalnız dərslikdəki məlumatları öyrətmək kifayət deyil. Onlara düşünməyi, araşdırmağı, düzgün seçim etməyi, milli dəyərlərini qorumaqla dünyaya açıq olmağı da öyrətməliyik.

Qərbi Azərbaycan məsələsində də təhsilin və milli yaddaşın xüsusi əhəmiyyəti var. Tarixi yurdlarımızdan deportasiya edilmiş soydaşlarımızın doğma kəndləri, şəhərləri, məktəbləri və müəllimləri ilə bağlı xatirələri nəsildən-nəslə ötürülür. Biz bu yaddaşı qorumağı, tariximizi gələcək nəsillərə doğru şəkildə çatdırmağı bacarmalıyıq. Çünki öz tarixini bilən və milli kimliyini dərk edən nəsil qarşısına qoyduğu məqsədlərə daha inamla gedir.

Mən bu gün məktəbə ilk dəfə qədəm qoyan uşaqları düşünərkən onların hər birində Azərbaycanın gələcəyini görürəm. Bu uşaqların içərisindən sabahın alimləri, həkimləri, müəllimləri, mühəndisləri, diplomatları və dövlət xadimləri çıxacaq. Onların hansı biliklərlə, hansı dəyərlərlə və hansı vətənpərvərlik ruhunda yetişməsi bizim hamımızın məsuliyyətidir.

Əziz şagirdlər, sizdən istəyim budur: çox oxuyun, çox öyrənin, sual verməkdən çəkinməyin. Dünyanın ən qabaqcıl biliklərinə yiyələnin, amma öz tarixinizdən, dilinizdən, mədəniyyətinizdən və Vətəninizdən uzaq düşməyin. Bilik insanı yalnız savadlı etmir, onu daha güclü və daha məsuliyyətli vətəndaşa çevirir.

Əziz müəllimlər, sizin qarşınızda dayanan hər bir uşaq Azərbaycanın sabahıdır. Sizin verdiyiniz bilik, aşıladığınız dəyər və göstərdiyiniz münasibət onların həyatında silinməz iz buraxa bilər. Müəllimlik buna görə sadəcə peşə deyil, böyük məsuliyyət və böyük etimaddır.

Bu əlamətdar gündə bütün müəllimlərimizi, şagirdlərimizi, tələbələrimizi və valideynlərimizi təbrik edirəm. Ümummilli Lider Heydər Əliyevin təhsilə verdiyi böyük önəmin bu gün Prezident İlham Əliyevin rəhbərliyi ilə ardıcıl şəkildə davam etdirilməsi hər birimizi sevindirir və gələcəyə inamımızı daha da artırır. Qoy bu siyasət nəticəsində Azərbaycanın hər bir guşəsində məktəblər elm və bilik ocağına, müəllimlər hörmət və etimad ünvanına, şagirdlər isə ölkəmizin böyük gələcəyinin qurucularına çevrilsin.

Qoy bu gün məktəblərimizdə eşidilən uşaq səsləri Azərbaycanın sabahının səsi olsun. Və gün gələndə həmin səslər tarixi yurdlarımızda da eşidilsin. Çünki bilik bizi gələcəyə aparır, milli yaddaş isə o gələcəyə hansı yoldan getdiyimizi bizə unutdurmur.