Qərbi Azərbaycan İcması

Əziz Ələkbərli,

Milli Məclisin deputatı,

Qərbi Azərbaycan İcması

İdarə Heyətinin sədri

27 sentyabr Azərbaycan xalqının yaddaşında hüznlə qürurun, itki ilə Zəfərin qovuşduğu müqəddəs bir tarixdir. Bu gün biz Vətən müharibəsində Azərbaycanın ərazi bütövlüyü uğrunda canından keçən şəhidlərimizi dərin ehtiram və sonsuz minnətdarlıq hissi ilə yad edirik. Onların hər birinin həyatı Azərbaycan tarixinin ən şərəfli səhifələrindən birinə çevrilib.

Şəhidlik Azərbaycan xalqının milli yaddaşında əsrlərdən gələn müqəddəs anlayışdır. Vətən təhlükə qarşısında qalanda onun müdafiəsinə qalxan oğullar öz həyatlarını xalqın və dövlətin gələcəyinə fəda ediblər. 2020-ci ilin 27 sentyabrında başlayan Vətən müharibəsi də bu böyük ənənənin müasir tariximizdəki ən parlaq təzahürlərindən biri oldu. Azərbaycan əsgəri öz canı bahasına tariximizin ədalətsizliyini dəyişdi, işğal altında olan torpaqlarımızın azadlığı uğrunda qəhrəmancasına döyüşdü.

Bu gün azad Qarabağda dalğalanan üçrəngli bayrağımıza baxarkən bilməliyik ki, həmin bayrağın hər dalğasında şəhidlərimizin nəfəsi, hər qələbə sevincində onların yarımçıq qalmış arzuları var. Bu Zəfər bizə asanlıqla nəsib olmayıb. Azərbaycan xalqı 44 günlük müharibədə minlərlə şəhid verdi, minlərlə ailə öz doğmasını itirdi. Bu itkilərin hər biri bizim milli yaddaşımıza əbədi həkk olunub.

Şəhidlərimizin qəhrəmanlığı qarşısında sözlər bəzən aciz qalır. Çünki şəhidlik sadəcə ölüm deyil, Vətən naminə ən böyük fədakarlıqdır. Şəhid öz ömrünü xalqının gələcəyinə bağışlayır. Buna görə də şəhidlərimizin xatirəsini yaşatmaq yalnız onların adını çəkməkdən, məzarlarını ziyarət etməkdən ibarət deyil. Əsl ehtiram onların uğrunda can verdiyi Azərbaycanın daha güclü, daha bütöv və daha firavan gələcəyi üçün çalışmaqdır.

Bu gün Azərbaycan ərazi bütövlüyünü və suverenliyini bərpa etmiş qalib dövlətdir. Qarabağda və Şərqi Zəngəzurda həyat yenidən qurulur, vaxtilə işğal altında olmuş torpaqlarımıza Böyük Qayıdış həyata keçirilir. Bu qayıdışın hər addımında şəhidlərimizin ruhu var. Çünki bu torpaqlara qayıdış onların uğrunda can verdiyi böyük məqsədin davamıdır.

Biz şəhidlərimizi yalnız Qarabağla bağlı xatırlamamalıyıq. Onların bizə qoyduğu ən mühüm miraslardan biri də milli yaddaşa sahib çıxmaqdır. Azərbaycan xalqının tarixi yaddaşı yalnız bir dövrün və ya bir ərazinin tarixi ilə məhdudlaşmır. Bu yaddaşda Qarabağ da var, Zəngəzur da, Göyçə də, İrəvan da, Vedibasar da, Dərələyəz də, Amasiya da, digər tarixi yurdlarımız da var. Bu yaddaşı qorumaq və gələcək nəsillərə ötürmək bizim mənəvi borcumuzdur.

Qərbi Azərbaycanlıların doğma yurdlarına qayıdış məsələsinə yanaşarkən də biz məhz bu tarixi yaddaşdan çıxış edirik. Qərbi Azərbaycandan deportasiya olunmuş soydaşlarımızın öz ata-baba yurdlarına qayıtmaq hüququ beynəlxalq hüququn prinsiplərinə əsaslanan legitim hüquqdur. Biz bu hüququ sülh yolu ilə, beynəlxalq hüquqa və ədalət prinsiplərinə söykənərək təmin etmək istəyirik. Qayıdış bizim üçün qarşıdurma deyil, tarixi ədalətin bərpası, sülh və birgəyaşayış perspektivinin formalaşdırılması deməkdir.

Qarabağın azadlığı bizə göstərdi ki, milli iradə, dövlətçilik əzmi və xalqın birliyi böyük tarixi məqsədlərin həyata keçirilməsində əsas qüvvədir. Lakin Zəfər yalnız əldə edilən nəticə deyil, həm də qorunmalı bir əmanətdir. Şəhidlərimizin bizə əmanət etdiyi Azərbaycanın ərazi bütövlüyünü, suverenliyini, dövlət müstəqilliyini və milli birliyini qorumaq hər birimizin üzərinə düşən məsuliyyətdir.

Bu gün şəhid ailələrinin qarşısında baş əyərkən onların çəkdiyi ağrını sözlə ifadə etməyin mümkün olmadığını bir daha anlayırıq. Heç bir medal, heç bir mükafat, heç bir söz şəhid övladının atasını, şəhid anasının oğlunu, şəhid həyat yoldaşının həyat yoldaşını geri qaytara bilməz. Amma Azərbaycan dövləti və xalqı onların fədakarlığını heç vaxt unutmamalı, şəhid ailələrinə göstərilən diqqət və qayğını daim uca tutmalıdır.

27 sentyabr həm də gələcək nəsillərə ünvanlanan bir tarixdir. Biz uşaqlarımıza deməliyik ki, bu torpaqlarda bu gün sərbəst dalğalanan bayrağın arxasında böyük bir mübarizə, ağır itkilər və misilsiz qəhrəmanlıq dayanır. Onlar bilməlidirlər ki, Vətən sadəcə xəritədə göstərilən ərazi deyil. Vətən insanın yaddaşı, kimliyi, dili, tarixi, ata-baba yurdu və gələcəyə ötürdüyü müqəddəs əmanətdir.

Bu torpağın hər qarışında bir şəhidin haqqı var. Qarabağın dağlarında, Şərqi Zəngəzurun yollarında, azad edilmiş kənd və şəhərlərdə, şəhid məzarlarında bu haqqın izləri yaşayır. Biz həmin haqqı unutmayacağıq. Şəhidlərimizin adlarını tariximizdə yaşadacaq, onların uğrunda can verdiyi dəyərləri gələcək nəsillərə çatdıracağıq.

27 Sentyabr – Anım Günü bizə bir daha xatırladır: Vətən uğrunda canından keçənlər ölmürlər. Onlar xalqın yaddaşında, dövlətin tarixində, azad torpaqlarımızın hər qarışında yaşayırlar.

Əziz şəhidlərimiz, ruhunuz qarşısında baş əyirik.

Sizin bizə əmanət etdiyiniz Azərbaycanı qorumaq, yaşatmaq və gələcək nəsillərə daha güclü şəkildə çatdırmaq bizim müqəddəs borcumuzdur.