Qərbi Azərbaycan İcması

Qərbi Azərbaycan İcmasında İcmanın Nərimanov rayon nümayəndəsinin təşkilatçılığı ilə şəhid ailələri və qazilərlə görüş keçirildi. Tədbirdə Vətən müharibəsi şəhidlərinin ailələri, qazilər, habelə QAİ rəhbərliyi iştirak etdi.

Əvvəlcə şəhidlərimizin əziz xatirəsi bir dəqiqəlik sükutla yad edildi.

Qərbi Azərbaycan İcmasının sədri, VI çağırış Milli Məclisin deputatı Əziz Ələkbərli bildirdi ki, şəhidlər bizim qürur yerimiz, onların ailələri isə əmanətlərimizdir. O qeyd etdi ki, 44 günlük Vətən müharibəsində 30 illik işğala son qoyub, xalqımızın alnındakı bu qara ləkəni silməyə şəhidlərimizin canı, qazilərimizin qanı bahasına nail olmuşuq. Onların xatirəsini əziz tutub, ailələrinin qayğısına qalmaq hər birimizin borcudur. Sədr bildirib ki, İcma tərəfindən Qərbi Azərbaycandan olan şəhidlər haqqında məlumatlar bir yerə toplanaraq nəşr edilib, tezliklə kitabın təqdimat mərasimi keçiriləcəkdir.

Daha sonra Vətən Müharibəsi Qəhrəmanı baş leytenant Azad Hümbətovun atası Arif Hümbətov çıxış edərək bildirdi ki, bu günkü tədbir şəhid ailələrinə göstərilən qayğı və ehtiramın növbəti nümunəsidir. O prezident İlham Əliyevin Azərbaycanı qalib dövlətə çevirməsindən və şəhidlərimizin qanının yerdə qalmaması üçün qətiyyət nümayiş etdirməsindən bəhs etdi.

Daha sonra çıxış edən Vətən Müharibəsi Qəhrəmanı polkovnik Zaur Nudirəliyevin həyat yoldaşı Nazilə Nudirəliyeva göstərilən diqqət və qayğıya görə ölkə başçısına, Qərbi Azərbaycan İcmasına təşəkkür edərək bildirdi ki, onların ailəsi də səbirsizliklə öz ata-baba yurdlarına, Qərbi Azərbaycana qayıdışı gözləyirlər və əmindirlər ki, bu gün uzaqda deyil.

Şəhid Rövşən Hüseynovun anası Sona Hüseynova, şəhid Mahir Mirzəyevin atası Sabir Mirzəyev və s. də qərbi azərbaycanlı olaraq icmanın diqqətini yüksək qiymətləndirib, böyük qayıdışa inamlarının tam olduğunu bildirdilər.

QAİ-nin Nərimanov nümayəndəsi Təmraz Tağıyev görüş üçün şəhid ailələrinə, qazilərə təşəkkür etdi. O Nərimanov rayon sakinləri olmuş hər iki Vətən Müharibəsi Qəhrəmanı ilə qürur duyduğunu, bu oğulların Qarabağ uğrunda döyüşə atılmalarında Vətən həsrətinin rol oynadığını bildirdi.

Görüşdə iştirak edən QAİ NTK sədri professor Vahid Novruzov qeyd etdi ki, bu gün bütün qərbi azərbaycanlılar inanırlar ki, öz tarixi torpaqlarına məhz ölkə başçısının qətiyyəti ilə sülh və əmin-amanlıq şəraitində qayıdacaqlar.

Sonda şəhid ailələrinə Qərbi Azərbaycan İcmasının üzvlük vəsiqələri və döş nişanları təqdim olundu, xatirə şəkli çəkildi.